Ағиҙелде аша кисмәнем,

Һыуҡайҙарын уның эсмәнем.

Әҙәм балалары шикелле,

Рәхәт көндәр күреп үҫмәнем.
Үҫә-үҫә ҡыҙ бала ҙур була,
Һөйгәненә баралмай, хур була.

Ағиҙелкәйҙәргә барҙыңмы,

Эйелеп-бөгөлөп һыуын алдыңмы?

Һөйөп кенә йөрөгән егетеңдән,

Ҡарасәскәй, тороп ҡалдыңмы?
Үҫә-үҫә ҡыҙ бала ҙур була,
Һөйгәненә баралмай, хур була.

Аттар саба, бәйге алам тип,
Ҡарасәс илай, йәрһеҙ ҡалам тип,
Атаһы ла көйөнә, әсәһе лә,
Бәхеткәйең юҡ шул, балам, тип.
Үҫә-үҫә ҡыҙ бала ҙур була,

Һөйгәненә баралмай, хур була.