Ыласындар оса, ай, һауала,

Мәҙинәкәйгенәм, гөлкәйем,

Һандуғастар ҡуна талдарға.

Һандуғастай һайрар ҡыҙ баланы,

Мәҙинәкәйгенәм, гөлкәйем,

Яҙмыш һата икән малдарға.

Йылға буйҡайҙары, ай, ҡамышлыҡ,

Мәҙинәкәйгенәм, гөлкәйем,

Аҡҡош балалары ҡағына.

Иртән генә тороп, тышҡа сыҡһа,

Мәҙинәкәйгенәм, гөлкәйем,

Тыуып-үҫкән ерен һағына.

Сал бөркөткәй осор, ай, шыҡыйып,

Мәҙинәкәйгенәм, гөлкәйем,

Ябалаҡ та йоҡлар түш киреп.

Таңдар атҡан саҡта бер ҡыҙ һыҡтай,

Мәҙинәкәйгенәм, гөлкәйем,

Түшәгендә ауыр төш күреп.